平日開工之前都會一陣報紙....

睇下標題,又睇下少少專欄...

今日覺得港男達人寫得幾有意思,所以就COPY出黎....

感情....還是需要時間,耐心,真正用心去建立的...

愛情先修班(下)---FROM港男達人(AM730)

如果有人為愛情設下若干條件同乜乜要求，對唔住！呢啲叫做交易，係用愛情包裝嘅一盤生意。如果唔多明，我可以打個比喻：父母生下仔女，會唔會先研究佢養唔養得大？生得靚唔靚仔/女？長大後份人工有幾多？會俾幾多家用？先至決定湊唔湊大佢，先至認唔認係自己仔女？我相信百分之一百唔會有父母咁做，因為愛係先付出，不能先求回報！

可惜好多人錯誤理解乜嘢係愛情，嘴裡成日不滿另外一半：「你都唔愛我嘅！」，事事睇唔順眼，吓吓最高要求，天天玩投訴，秒秒要人湊，呢種人注定一世唔開心，好聽叫完美主義者，難聽叫自作自受型，佢哋永遠覺得自己要求最合理，人哋最有問題，日日set啲難題俾身邊嘅人，你做咗A就要B，做埋B就諗C，不斷想證實有人痛錫遷就自己，去證明愛情存在，但次次都證明唔到，或者轉眼消失！

你問點解？因為行嘅方向錯晒吖嘛！細佬用番為人父母嘅比喻，最幸福嘅階段肯定係，BB最需要你照顧嘅日子，雖然辛苦但係有意義，你得到嘅愛唔使由佢咀仔講出嚟，唔使要佢打手指模簽約，係由你無償付出然後無形所得，愛情都一樣，你追求最高層次嘅愛情，要通過不問後果嘅付出，先至會擁有。

換句話講，如果你先為愛情設下期限(你要愛我一生一世)、定下目標(出年12月之前娶我)！立下條件(你要買到樓先好求婚)、講好分工(我唔做家務)、訂立合約(唔會同你阿媽住)，咁請你唔好咁大聲話人哋唔愛你，因為你只不過係揾個人同你簽約做partner，大家一齊開飯、發洩性慾同繁殖下一代，咁唔係叫做戀愛，你日後結咗婚feel唔到有愛係應該同合理，生埋仔女佢偷食係唔出奇，因為你哋只係生活上嘅合夥人，唔算係戀人！

唓！有人實反駁，達人你講到咁grand，有幾多人做得到呀？萬一付出晒，對方都唔愛我咁點算？咪好蝕本？我好想反問番你哋，咁鬼孤寒留番啲時間同感情嚟做乜？蝕咗啲乜嘢又咁大把？我見過好多單身港男港女，寧願一個人都唔去約吓人，放低自尊，主動少少，任由日子過去，到有人約會，又嫌三嫌四，自絕於對方，唔該你哋唔好咁怕輸啦，愛多啲唔會死人㗎！